ساعات كتير بسأل نفسي

ساعات كتير بفكر و بسأل نفسي

ليه الانسان النوبي مرهف المشاعر .. رقيق الاحساس .. بيحمل ذوق و روح فنان

بيعرف بفطرته يتذوق الفن كويس قوي.. بيحب يغني .. و يضحك .. و يرقص.. غالبا صوته حلو .. و اذنه موسيقية.. تشوفه مع الموسيقى النوبية بيتمايل.. منسجم قوي.. و يردد الاغنية و لا اجدع كورال مدرب..!!؟

و غالبا برضه.. الانسان النوبي بينجح اكتر في شغله لو كان فيه اي نواحي ابداع.. فتلاقيه متميز في المعمار .. و الاشغال اليدوية و الفنية.. و في الرسم و الاخراج.. لكن مالوش في الرياضيات و اللوغاريتمات.. و الفلك و الحسابات!!!؟

يا ترى ليه.. يمكن البيئة اللي نشأ فيها ليها تأثير عليه

النيل اللي يوم سبوعه غسلوا وشه فيه

و الخضرا و النخيل و البلح.. و البيت البسيط اللي زي قلبه ابيض

حتى في الفرح.. بيقدموا بلح و فشار.. بلح اسمر زيهم.. وفشار في بياض قلبهم

حتى لما بيلعبوا في الطين.. طينهم نضيف مش زي اي طين!!؟

و لاّ يمكن هو النيل.. اللي مفيش بينه و ما بينهم سور.. اللي بيعدي عندهم قبل ما يتلوث بنفاق أو جشع او غرور

ليه النوبي اصيل بطبعه..؟ فنان و انسان بفطرته..؟! الحقيقة معنديش تفسير..!!! و تحياتي..,