عمارة يعقوبيان.. كتبت في صيف 2006
عمارة يعقوبيان
طبعا أكيد الكل سمع عن الضجة اللي أحدثها الفيلم ده بسبب الجدل اللي أثير حوله!!؟
فالبعض يؤيد حرية الفكر و حجتهم أن الرواية اللي كتبها علاء الأسواني متداولة في السوق منذ سنوات .. و البعض يعارض.. و يرى أن الفيلم لا يسلط الضوء إلا على النماذج السيئة و يشجع على الرذائل..!!! ؟
أنا زيي زيكم قريت النقد الموجهة للفيلم.. و اللي كان أكبر دعاية ليه!!؟
و قريت أراء ناس كتير دخلوا الفيلم.. و قريت كمان التظلم اللي واخد صفحة كاملة في الجورنال و اللي نشرته أسرة الفيلم اعتراضا على اقتراح بسحب الفيلم من دور العرض.. الحقيقة الحاجات دي كلها أثارت فضولي.. و قلت لازم أحكم بنفسي.. و أصريت أدخل الفيلم برغم ان كل اللي دخلوه قبلي في العيلة نصحوني اني اتراجع عشان الفيلم بيخدش الحياء!!؟
و في صالة العرض قعدت اترقب بداية الفيلم بحماس.. و حاولت أركز على كل تفصيلة صغيرة في التيتر.. أنا أصلي بحب تترات الأفلام.. و في نظري التتر زي غلاف الكتاب .. يشدك تشتريه أو ينفرك منه.. و الحقيقة التتر كان جميل!! ؟
في البداية الراوي يحيى الفخراني حكى باختصار تاريخ العمارة .. اللي بناها الخواجة يعقوبيان و كان بيسكن فيها البهوات و البشوات لحد ما جم ظباط الثورة و اغتصبوا الشقق من أصحابها و تغيرت التركيبة السكانية للسكان.. بعد كدة الفيلم بيركز على أربع شخصيات رئيسية: زكي الدسوقي (عادل امام) ابن البشوات اللي اتعلم في فرنسا.. و بالرغم من انه مهندس الا انه مبيشتغلش!! و عايش على املاك اسرته
طه الشاذلي (محمد امام) ابن البواب .. و ازاي بعد ما كان عايز يبقى ظابط بوليس .. لم يقبل في الكلية بسبب نظرة المجتمع للطبقة اللي بينتمي ليها.. و ازاي بعد كدة بيتغير مسار حياته لما يلتحق بالتيار الاسلامي في الكلية
الحاج عزام (نور الشريف) بيرمز لبشوات العصر اللي هم عبارة عن ناس من أصول متواضعة و كونوا ثروات ضخمة من تجارة غير مشروعة (هنا المخدرات) و لكنه بيتخفى في عباءة الدين و الالتزام.. فنراه مثلا بيشرب حشيش هو و ابنه!! و معندوش مانع يجهض مراته و يحرمها من زيارة ابنها الوحيد!! ؟
الصحفي الارستقراطي حاتم رشيد (خالد الصاوي) المثلي الشاذ
بعد كدة أي شخصية من الاريعة دول مرتبط بيها شخصيات تانية في الحكاية بتاعتها و الشخصيات دي : اسعاد يونس و هند صبري و احمد راتب و احمد بدير و يوسف داود و يسرا و طلعت زكريا و جيهان قمري ــــــــــ في حكاية عادل امام محمد الدفراوي و احمد السعدني و هند صبري برضه ــــــــ مع محمد امام سمية الخشاب و تامر عبد المنعم و خالد صالح و سعيد طرابيك ـــــــــ مع نور الشريف
عجبني في الفيلم: الأداء الجميل و البارع من الممثلين.. معظمهم الحقيقة أدى دوره باجتهاد و اقتدار الجراءة في التناول (مش في الحوار) .. يعني مثلا ظابط أمن الدولة اللي يمكن الفيلم ده من الأفلام النادرة اللي متطلعش ظابط البوليس البطل الهمام اللي بينقذ أرواح الناس الأبرياء في آخر لحظة .. و من غيرة كان الزمن وقف و الكون اتشلت حركته!!! و الوزير الفاسد المرتشي اللي فاكر البلد العزبة بتاعته هو و أمثاله.. الحقيقة محستش بالملل في الفيلم كما هي العادة في بقية أفلامنا
لكن اللي معجنيش: ان كل شخصية من الشخصيات دول حكايتها منفصلة كلية عن حكاية الشخصيات الثانية .. و مفيش أي شخصية من الشخصيات قابلت الشخصية الثانية و كان بينهم حوار غير مرة جمعت عادل امام و خالد الصاوي عند الأسانسير!! مفيش غير بس هند صبري اللي كانت بتحب محمد امام و بعدين سابته و اشتغلت في مكتب عادل امام!! و على فكرة هند صبري هي بطلة الفيلم مش يسرا!!
معجنيش كمان بعض مشاهد كانت ممكن توصل نفس المعنى لكن لو كانت اتأدت بشكل تاني!! و معجبنيش ان السبب في شذوذ خالد الصاوي اعتداء الخادم عليه و هو صغير(اللي أكاد اجزم انه نوبي و على ما اذكر كان اسمه ادريس) في أثناء انشغال والده و والدته عنه.. !!!!!!!!!!!!!!!!!؟
لكني و الحقيقة اجمالا عجبني الفيلم .. و شايفة انه أفضل من أفلام كتير اتقدمت.. و لسه هتقدم!!
posted by bintbeladi at
8:32 PM
0 Comments:
Post a Comment
<< Home