المؤلم.. و المؤلم حقا
لفت نظري في بريد الأهرام اليوم الثلاثاء 8/8 هذا الموضوع
الموضوع بيناقش تلوث مياه النيل.. الموضوع كاتبه دكتور اسمه عوض حنا سعد بعنوان المؤلم حقا
في النصف الثاني من أغسطس من كل عام تحتفل مصرنا الحبيبة بوفاء النيل شريان حياتها, ومناسبة تاريخية ثقافية بيئية غاية في الأهمية تعود بنا الي الوقت الذي كان فيه أجدادنا الفراعنة يزفون اليه اجمل الفتيات عرفانا وتقربا لوفائه الدائم, واتساءل ماذا قدمنا ونقدم ـ نحن ابناء الفراعنة ـ ردا لجميل هذا النهر الخالد؟!, وقد قابلنا وفاءه بالجحود القاتل فاعتبرناه اسهل الوسائل للتخلص من النفايات, وألقينا فيه بأقذر ما فينا, نصب فيه مياه الصرف الزراعي دون معالجة لما تحتويه من سموم بقايا الأسمدة والمبيدات, ونلوثه بالصرف الصحي بما يحمله من فضلات الانسان السائلة والصلبة وتتخلص الكثير من شركاتنا ومصانعنا علي ضفافه من صرفها الصناعي الملئ بالمواد والعناصر الضارة, والحقيقة ان هناك كما هائلا من السموم يتركز في الاحياء المائية والحيوانات مسببة مشاكل صحية للانسان, والمؤلم حقا ان كل محافظات مصر بلا استثناء لها دور في تلوث نهر الليل وإفساده, فمتي نكون اوفياء للنهر الخالد؟!.
و لكن بقليل من التمعن هنلاقي مش بس تلوث النيل اللي مؤلم .. و انما حاجات كتير حوالينا.. و للأسف جوانا..! و اسمحولي أرصد بعض
منها
من المؤلم حقا.. تدني مستوى المصريين في اللغة العربية ..! معرفش هل السبب راجع لمستوى التعليم الذي لا يخفى على أحد.. و لا لعدم اهتمام الأب و الأم بالقراءة و تشجيع أولادهم عليها..! و تلاقي ناس كتير بتقول: "ياه.. العربي أنا كنت بكرهه موت.. مادة رخمة و دمها تقيل"!! اللغة العربية اللي دول تانية بتعتبرها تاج على الرؤوس.. ده طبعا غير النطق الخاطئ لمعظم حروفها..! ؟
من المؤلم حقا.. الموقف المخزي للحكومات العربية من اللي بيحصل في لبنان.. ايه الخنوع و الذل ده!! مش هقول أكتر من كدة.. من المؤلم حقا.. فساد الذمم اللي بقى شيء عادي جدا على أرض مصرنا المحروسة..! مبنى اتبنى (أفتكر جراج رمسيس) و الحكومة متعرفش عنه حاجة..!! و محافظ القاهرة ميعرفش ايه اللي بيحصل على أرض محافظته.. كأنه يا عيني و لا مرة عدى من تحته و لا حتى سمع عنه من الناس اللي مبيتبلش في بقهم فولة..!؟
من المؤلم حقا.. ان نقتل بأيدينا قدرتنا على الابداع .. ثم نأتي و ندفع دم قلبنا في تكنولوجيا مستوردة..! و اللي يضحك ..اننا بعد ما نستوردها منستخدمهاش!! من المؤلم حقا.. اننا نعمل فرح و مؤتمرات و حفلات و اعلانات.. عشان ايه .. هنجمع عربية صيني.. ايوة صيني..!! و عربية عربية.. مش لعبة أطفال..! هنجمعها في بلدنا و بسواعد مصرية!! يا سلام على التصنيع.. يا سلام على المهلبية.. و كفاية كدة.. و لكن.. ما زال الألم مستمرا..
posted by bintbeladi at
8:32 PM
0 Comments:
Post a Comment
<< Home