رؤوس أقلام

واقعة التحرش في وسط البلد

ماذا نتوقع من حكومتنا الرشيدة..؟ الانكار .. و قد حدث

و ماذا تتوقع حكومتنا الرشيدة..؟ فلتتوقع ما هو أسوأ و ذلك بما كسبت أيديها

اللي اتفضح و اتعرى في الواقعة دي.. هي الحكومة..

حكومتنا الرشيدة.. إخييييييييييييي عليكي..! ؟

تلوث مياه الشرب بالصرف الصحي

حاجة غريبة خالص.. مع إن حكومتنا الرشيدة بتصرف مليارات سنويا على مياه الشرب و الصرف الصحي.. و طبعا الانكار و تضارب التصريحات بيبقى حل اوريجينال في مثل هذه الحالات..! و في الآخر.. تتحدث حكومتنا الرشيدة عن الشفافية.. هي ممكن تكون شفافية مياه أكوا فينا.. أو شفافية ملابس مطربات ميلودي انما أكيد مش شفافية تصريحات الحكومة..!!؟

الغريبة بقى و لو انها مش غريبة.. إن قبل اربع سنوات حذر فريق بحث أمريكي من تبعات تلوث مياه الشرب في الدقهلية و في غير الدقهلية.. و لكن لا حياة لمن تنادي

الجرائد المصرية.. بملامح صينية

الجرائد القومية أصبحت الآن جرائد صينية.. الصينين راحوا .. الصينين جم..!! الحقيقة ان هنيدي هو أول من حقق سبق صيني و سبق الجرايد بكتير.. في فول الصين العظيم!! ؟

مصائب قوم عند قوم فوائد

ما زلنا في صدد الحديث عن الصين و الصينين (اصحاب الأجسام الصغيرة و العقول الكبيرة) فكوارث سكك حديد مصر ستصب في الصالح الصيني.. لأن على ما يبدوا إن الهيئة بالتعاون مع الحكومة شافت ان العيب في القطارات الفرنسية و الأسبانية اللي استوردتها قبلا.. فقالوا يجربوا الصيني.. و عجبي!!؟

السندريلا و العندليب

على المستوى الفني.. مشوار يحترم على المستوى الانساني.. و أنا مالي!! هما قارفين الناس و قارفين نفسهم ليه بمسلسلات تجسد قصة حياتهم.. هل حياتهم الشخصية مهمة لهذه الدرجة.. هل هي بأهمية حياة غاندي أو السادات مثلا!!

آه يا بلد

مصر من زمان تعتبر بلد طارد للعقول.. لا ديموقراطية.. لا مساواة في الحقوق.. و لستة طويلة من اللاءات..! و لكنها فقط أرض خصبة و جاذبة لأهل الفن (آل فن آل) و لأصحاب الدوم دوم تيك تيك!! ؟

إوعى تتحدى الملل

إوعى تتحدى الملل.. أخاف عليك من التفاهة.. و أحذرك من الشلل!! ؟

محدش بيموت ناقص عمر

إذا ركبت طيارة فاطرد من عقلك ذكرى طائرة نيويورك القاهرة و إذا ركبت قطار فاوعى تسمح لنفسك تفتكر سلسلة حوادث قطارات س. ح. م و إذا ركبت عبارة فغمض عينيك في محاولة لعدم تذكر عبارة الموت و قول لنفسك أنا مش قصير أوزعة...إحم قصدي تقول لنفسك دي سلسلة أفلام مرعبة انتاج مشترك بين حكومتنا الموقرة و القطاع الخاص.. ثم ابتسم انت في مصر.. لو حد وقع في بلاعة و هو ماشي في أمان الله.. يبقى مامتش ناقص عمر..!!؟

الحكومة بتهرج

انتوا عارفين حكومتنا دمها خفيف و بتحب التهريج..! فقال ايه في مشروع ابني بيتك بنفسك الحكومة هتديك قطعة أرض و هدية 15000 جنيه وفوقهم بوسة!! انت طبعا هتقول لنفسك آخد الأرض و الفلوس و خليلهم البوسة.. مع الأسف مينفعش.. عشان الحداية مابترميش كتاكيت..

الفضائية المصرية

بين القنوات الفضائية الأخرى عاملة زي ست كانت غنية و شابة.. ولادها أتوا على خيرها.. و أكل عليها الدهر و شرب.. فأصبحت عجوز.. لا مال و لا جمال و لا شباب.. بس المشكلة إنها ما زالت مصرة على منافسة شابات جميلات.. مع إنها تعي جيدا أنها غير قادرة على المنافسة!! ؟

سمعت بس مشفتش بعيني

سمعت عن حوار أحمد فؤاد نجم مع نيشان على قناة نيو اللبنانية.. سمعت إن نجم لخبط كتير في الكلام.. سمعت إن الارسال اتقطع كام دقيقة و رجع تاني.. حد عارف هل نجم ما زال حي يرزق..؟

محدش يقرا تاريخ

في حوار لعادل إمام مع هالة سرحان على روتانا.. عادل قال: عايزة تشوفي التاريخ اتفرجي على أفلامي..!! يا جماعة بلاش تقروا تاريخ.. أفلام عادل كفاية!!

العب و اضحك و اتألم

الشعب المصري غلبان.. من غلبه بيضحك على همه.. و بيألف على حاله المعيشي المتدني نكت.. و دلوقتي بقى هيلعب كمان.. ع الانترنت لعبة مبارك هيحاول فيها يسرق الثلاثين قرش اللي زودها على كل لتر بنزين و أنت مهمتك تحاول تنقذ القروش قبل ما يوصلوا جيب مبارك ..! حاجة تفطس من الضحك .. الضحك المليء بالألم!!؟

اللي اختشوا ماتوا

من مصادر على الانترنت.. لأن الموضوع طبعا بعيد عن النشر ملكة جمال مصر للشواذ سافرت تايلاند بعد أن تمت تصفية و احتفال للمسابقة في بلدنا.. مصر!! و الملكة الشاذة وصلت هناك للتصفيات بعد أن قدمت هي و المتسابقات رقصات عارية .. و لكن فازت المكسيكية إريكا أندروز باللقب.. المصدر الانترنتي بيحمد ربنا ان مفيش وصيفة أولى و ثانية.. و إلا لكان رفع العلم و عزف النشيد الوطني..!! مش عارفة أقول ايه.. يظهر إن هو ده العبور للمستقبل!!؟

لتعميق العلاقات.. نصائح مجانية

يبدو إن الريس شاف إن السبيل لتدعيم العلاقات المصرية الروسية توجيه النصائح للرئيس بوتين بتغيير الدستور لمد الحكم لفترات و فترات!! ده جاء على لسان الرئيس لصحيفة فريميا نوفوستي الروسية المضحك في الموضوع إن المتحدث باسم الرئاسة سليمان عواد نفى كلياً ما قاله الرئيس الموقر.. مش فاهمة ليه؟ و ايه المشكلة لما يدي الريس للزعيم الروسي خلاصة الخلاصة في نصيحة أخوية!!

ليه تشغل بالك

احنا يمكن البلد الوحيد اللي عندنا الرصيف ادوار.. و بسلالم!! ليه..؟ عشان العربيات متقدرش تركن فوقه.. أما العربيات لو ركنت في خط موازي للرصيف في أماكن ممنوع فيها الانتظار.. فالحل هنا دق عواميد على جانب الرصيف لمنع انتظار السيارات بالشكل العشوائي ده..!! أما بقى شركات الدوا عشان متبقاش عشوائية و ضعيفة و تضعف سوق الدواء في مصر.. فالحل العبقري منع انشاء الشركات اللي رأس مالها أقل من 50 مليون جنيه!! عشان دايما بنحب الحلول السهلة و السريعة حتى و لو كانت أسوأ الحلول!! الحلول اللي متتعبناش.. اللي متقرفناش.. اللي متخليناش نشغل الجمجمة!! هو إحنا لسة هنحل المشكلة من جذورها.. و نعمل بقى رقابة و غرامات و نزعل الناس مننا!!؟ لا يا عم خلينا كدة ننام و نسمع عبد الوهاب و نتسلطن.. "ليه تشغل بالك.. مين يرحم حالك"

عزيزي محدود الدخل.. لا تقرأ هذه الإعلان

عزيزي محدود الدخل.. لا تقرأ الاعلان الآتي حفاظا على سلامتك الصحية و العقلية و النفسية..! إعلان عن حذاء بأكتر من 800 جنيه و الاعلان بيقول: "لا يقدر بثمن" و الاعلان الثاني عن بنك بيقول:"دلوقتي تقدر تغير ديكور شقتك" أيوة .. أيوة.. ما هي وقفت بس على تجديد الديكور..!! ؟