هي وردة بلدي واحدة

الورد.. في حد مبيحبش الورد..؟

الورد جميل.. و النفس البشرية دايما بتهفو لكل شيء جميل

الورد لسان اللي مبيجدش فن الكلام

و جسر تواصل .. للي بيجهل طرق التواصل

أنا عن نفسي بحب الورد

كل الورد

لكن بيأسرني الورد البلدي

في طريق شغلي مشاتل ورد.. لما بشوف الورد البلدي الأحمر بيبقى نفسي أشتري وردة.. لكن معرفش ايه اللي بيمنعني..!؟

و لما أشوف أي حد بيحبني .. إخواتي .. صحباتي بيبقى نفسي أقولهم

لو بتحبيني .. هاديني بوردة

لو عايزة تصالحيني.. راضيني بوردة

لو نفسك تسعديني.. جيبي لي وردة

و لو زعلانة مني .. سامحيني

و آدي وردة

هي وردة واحدة.. ممكن نهادي بيها بعض

مش لازم الورد يقترن بعيد الحب

و مش لازم يكون لغة العشاق بس

ممكن يبقى لغة جميلة برضه بين الاخوات و الأصحاب

و بين الأولاد و أبائهم كمان

عمري ما أهديت بابا وردة.. أتمنى لو كنت فعلت