برود أعصاب القطة

مع زحمة الأحداث و الأخبار اللي بتحصل في البلد كل يوم

ده غير طبعا مشاغل الواحد الطبيعية زي الشغل و البيت

في وسط كل الزحمة دي.. بلاقي نفسي عندي وقت أفكر في القطط!!؟

أحيانا و أنا ماشية في الشارع كنت ألاقي جثة قطة مرمية جنب الرصيف لحد ما يجي عامل النظافة (قديما كان اسمه الزبال) و يشيلها مع باقي النفايات (قديما كانت زبالة العولمة بقى تحكم)!!؟

فكنت بقول في نفسي: أصحاب العربيات معدومي الانسانية دول.. ازاي يجي لهم قلب يدوسوا على قطة كدة و يفعصوها بوحشية.. و الا اكمنها قطة شوارع يعني و معندهاش حد يدور عليها..؟ و لا يعني عشان معندناش منظمات حقوق الحيوان اللي كانت بهدلتهم و طلعت عنيهم.. مساكين قطط الشارع.. !؟

كان ده اللي بيجي في بالي كل ما أشوف المنظر الوحشي ده.. لحد في يوم و أنا ماشية في الشارع في طريق رجوعي من الشغل لقيت قطة بتعدي الشارع بكل برود أعصاب و تاته تاته و على مهلها على الآخر.. و هي شايفة بعنيها العربية جاية بسرعة إزاي..!!!؟ لكن و لا همها و بصت للعربية بكل اعتزاز و كبرياء و كملت مشي على أقل من مهلها..!!؟

طبعا أنا اتجننت منها و العربية كانت خلاص على وشك تفرمها.. أنا حاولت أتدخل في المهمة المستحيلة دي و شاورت لصاحب العربية ان يعني خلي عندك دم و هدي شوية.. !! فعلا الراجل كتر خيره هدّى السرعة لحد ما الست قطة هانم عدت الشارع..!!؟

اللي أنا متأكدة منه إن الراجل كان متغاظ مني قد ما أنا كنت متغاظة من القطة.. لحد دلوقتي مش لاقية تفسير لبرود الأعصاب ده.. هل القطة زهقانة من حياتها و من عيشة الشوارع في البرد و الحر.. و لا مثلا عايزة تنال شرف إنها ماتت مهروسة تحت عجلات عربية في بلد ميعرفش الرفق بالحيوان..؟