صندوق الذكريات

في مواقف كتير بتحصل في حياتنا و احنا صغيرين بيأبى عقلنا أبداً أن ينساها.. و بتفضل محفورة في عقلنا و متخزنة في صندوق ذكرياتنا! من المواقف دي ليّا موقف مع بابا .. دايما بفتكره لأنه عندي حاجة كبيرة قوي

في مرة كنت أنا وبابا ماشين مع بعض (كنا بنحب نتمشى مع بعض و نتكلم.. مع إني كنت طفلة مفعوصة و لسة في ثانية ابتدائي!!) و بعدين و إحنا بنتمشى شفت عقد عجبني و شاورت لبابا عليه و قلت له: حلو العقد ده يا بابا مش كدة..؟ فبابا قال لي: تحبي أجيبهولك!؟
و برغم إني مكنتش عايزاه .. يعني مكنش عندي رغبة حقيقية في امتلاكه و مكنش فارق معايا يبقى عندي و لاّ يفضل متعلق في الفاترينة.. إلاّ إن بابا اشتراه مخصوص عشاني .. مش عشان نفسي فيه.. و إنما عشان بس أبديت إعجابي بيه و أنا ماشية معاه

الموقف ده عزيز عليّا قوي لأن بابا بيثبت لي فيه إنه مش بس بيحبني.. لا ده بيأكد حبه ده بتصرفات عملية بينفذها حالاً..!! صدقوني النقطة دي مهمة قوي.. مهما تكون عارف إن اللي قدامك بيحبك .. بتحب إنه يثبت لك ده بتصرفات فعلية.. تمام زي بابا..!!؟